ସୁସ୍ଥ ଶରୀର ପାଇଁ ସୁସ୍ଥ ଖାଦ୍ୟ ନିହାତି ଜରୁରୀ। ସୁସ୍ଥ ଖାଦ୍ୟ ଖାଇବା ଦ୍ଵାରା ସ୍ୱାସ୍ଥ୍ୟ ସମ୍ବନ୍ଧୀୟ ଅନେକ ସମସ୍ୟାରୁ ରକ୍ଷା ମିଳିଥାଏ। କେବଳ ଏତିକି ନୁହେଁ, ଯଦି ନିଜ ଶରୀରର ବିକାଶ ଏବଂ ରକ୍ଷଣାବେକ୍ଷଣ ପାଇଁ ସଠିକ୍ ଖାଇବା ଅଭ୍ୟାସ ଗ୍ରହଣ କରାଯାଏ, ତେବେ ବିନା କୌଣସି ସମସ୍ୟାରେ ବୟସର ପ୍ରତ୍ୟେକ ପର୍ଯ୍ୟାୟ ଅତିକ୍ରମ କରି ହେବ।
ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁଯାୟୀ, ସୁସ୍ଥ ଖାଦ୍ୟ ହାଡର ସ୍ୱାସ୍ଥ୍ୟ ଏବଂ ଘନତ୍ୱକୁ ବଢାଇଥାଏ, ଅଷ୍ଟିଓପୋରୋସିସ୍ ରୋଗର ବିପଦକୁ ରୋକିପାରେ। ଯେଉଁମାନଙ୍କର ପୂର୍ବରୁ ଅଷ୍ଟିଓପୋରୋସିସ୍ ଅଛି, ଡାକ୍ତରମାନେ ସେମାନଙ୍କୁ ଉପଯୁକ୍ତ ଖାଦ୍ୟ ଏବଂ ସୁସ୍ଥ ଜୀବନଶୈଳୀକୁ ଚିକିତ୍ସା ଭାବରେ ଗ୍ରହଣ କରିବାକୁ ପରାମର୍ଶ ଦିଅନ୍ତି।
କିନ୍ତୁ କିଛି ଖାଦ୍ୟ ହାଡକୁ ମଜଭୁତ କରୁଥିବା ବେଳେ ଏମିତି ଅନେକ ଖାଦ୍ୟ ଏପରି ଅଛି ଯାହା ହାଡକୁ ଦୁର୍ବଳ ମଧ୍ୟ କରିଦେଇଥାଏ। ତେବେ ଆସନ୍ତୁ ଜାଣିବା ସେହି ଖାଦ୍ୟଗୁଡିକ କଣ?
ଖାଦ୍ୟ ରେ ଅଧିକ ପରିମାଣର ଲୁଣ :
ଅସ୍ଥି ସ୍ୱାସ୍ଥ୍ୟ ଏବଂ ଅଷ୍ଟିଓପୋରୋସିସ୍ ଫାଉଣ୍ଡେସନ୍ ଅନୁଯାୟୀ ଯଦି ଆପଣ ଖାଦ୍ୟରେ ଅଧିକ ଲୁଣ ଖାଆନ୍ତି, ତେବେ ଏହା ଶରୀରରେ କ୍ୟାଲ୍ସିୟମ୍ ଅଭାବ କରିବା ସହ ହାଡକୁ ନଷ୍ଟ କରିଦିଏ। CDC ଅନୁଯାୟୀ, ଦୈନନ୍ଦିନ ଖାଦ୍ୟରେ ୪୦% ସୋଡିୟମ୍ ପିଜା, ସାଣ୍ଡ୍ୱିଚ୍, ସୁପ୍, ପନିର କିମ୍ବା ପ୍ରକ୍ରିୟାକୃତ ଖାଦ୍ୟ ମାଧ୍ୟମରେ ଆମ ଶରୀରକୁ ପ୍ରବେଶ କରିଥାଏ।
ମଦ୍ୟପାନ କରିବା :
ସ୍ୱାସ୍ଥ୍ୟ ବିଶେଷଜ୍ଞଙ୍କ ମତରେ ମଦ୍ୟପାନ ଶରୀରର କ୍ୟାଲ୍ସିୟମ୍ ଏବଂ ଭିଟାମିନ୍ D ଶୋଷଣ କ୍ଷମତାକୁ ପ୍ରଭାବିତ କରିଥାଏ। ଏହା ସହିତ, ଲଗାତର ମଦ୍ୟପାନ ଦ୍ୱାରା ହରମୋନ୍ ଅସନ୍ତୁଳନ ହୋଇପାରେ, ଯାହା ହାଡ ଗଠନର ଗତିକୁ ହ୍ରାସ କରିଦିଏ। ତେଣୁ, ଅଷ୍ଟିଓପୋରୋସିସ୍ ରୋଗରେ ପୀଡିତ ବ୍ୟକ୍ତିମାନେ ଯଥାସମ୍ଭବ ମଦ୍ୟପାନଠାରୁ ଦୂରରେ ରହିବା ଉଚିତ୍।
ଶର୍କରାଜାତୀୟ ଖାଦ୍ୟ :
ଚିନିର ଅତ୍ୟଧିକ ବ୍ୟବହାର ହାଡର ସ୍ୱାସ୍ଥ୍ୟ ଉପରେ ମଧ୍ୟ ଖରାପ ପ୍ରଭାବ ପକାଇଥାଏ। ଅଧିକ ଚିନି ଖାଇବା ଦ୍ୱାରା କ୍ୟାଲ୍ସିୟମ୍, ମ୍ୟାଗ୍ନେସିୟମ୍ ଏବଂ ପୋଟାସିୟମ୍ ପରିସ୍ରା ମାଧ୍ୟମରେ ବାହାରି ଆସେ। କେବଳ ଏତିକି ନୁହେଁ, ଏହା ଭିଟାମିନ୍ D ସ୍ତର ହ୍ରାସ କରି ହାଡର ସୃଷ୍ଟିରେ ବାଧା ମଧ୍ୟ ସୃଷ୍ଟି କରିପାରେ ଏବଂ କ୍ୟାଲ୍ସିୟମ୍ ଅବଶୋଷଣକୁ ମଧ୍ୟ ହ୍ରାସ କରିପାରେ।