ଆଜିର ମଣିଷ ନିଜକୁ ସଭ୍ୟ ଏବଂ ଶିକ୍ଷିତ ବୋଲି କହୁଛି। କିନ୍ତୁ, ଦିନକୁ ଦିନ ଏହି ସଭ୍ୟ ସମାଜରେ ନାରୀ ମାନଙ୍କ ପ୍ରତି ହେଉଥିବା ଅତ୍ୟାଚାର ବଢିବାକୁ ଲାଗିଛି। ଏଭଳି ହିଁ ଏକ ଘଟଣାକ୍ରମରେ ଦଶମ ଶ୍ରେଣୀରେ ପଢ଼ୁଥିବା ଜଣେ ନାବାଳିକା ଦୁଷ୍କର୍ମର ଶିକାର ହୋଇଛନ୍ତି।
ସବୁଠାରୁ ବଡ଼ କଥା ହେଉଛି ଏହି ଘଟଣା ଖୋଦ୍ ପୀଡିତାଙ୍କ ବଡ଼ବାପା ଭିଆଇଛନ୍ତି। ଯାଜପୁର ଜିଲ୍ଲା ଦଶରଥପୁର ଥାନା ଅଞ୍ଚଳରେ ଏଭଳି ଘଟଣା ଘଟିଯାଇଛି। ସୂଚନା ମୁତାବକ ଝିଅଟି ସକାଳୁ ଟିୟୁସନ୍ ଯାଇଥିବା ବେଳେ ସମ୍ପର୍କୀୟ ବଡବାପା ଦୟାନିଧି ଜେନା ଝିଅକୁ ମାଆର ଦେହାଖରାପ ଥିବା ମିଛ କଥା କହି ବାଇକ୍ ଯୋଗେ ଭଦ୍ରକ ନେଇଯାଇଥିଲେ। ନେଇ ସେଠାରୁ ଦୟାନିଧି ତାଙ୍କୁ ପଶ୍ଚିମବଙ୍ଗ ନେଇଯାଇଥିଲେ।
ପଶ୍ଚିମବଙ୍ଗ ଯିବା ବାଟରେ ହିଁ ରାକ୍ଷସ ଦୟାନିଧି ଜୋରଜବରଦସ୍ତ ପୀଡିତାଙ୍କୁ ବସ ଭିତରେ ହିଁ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଚଳନ୍ତା ବସରେ ଥରେ ଦୁଇଥର ନୁହେଁ ବରଂ ଚାରି ଚାରି ଥର ତାଙ୍କୁ ନିର୍ଯ୍ୟାତନା ଦିଆଯାଇଛି।
କେବଳ ସେତିକି ନୁହେଁ ବରଂ ଏକଥା କାହାକୁ ଯଦି କହିବୁ ତେବେ ତାକୁ ଜୀବନରୁ ମାରିଦେବି ବୋଲି ମଧ୍ୟ ଧମକ ଦେଇଥିଲା ଅଭିଯୁକ୍ତ। ସବୁ କାମ ସରିଯିବା ପରେ ଅଭିଯୁକ୍ତ ଝିଅଟିକୁ ପଶ୍ଚିମବଙ୍ଗରୁ ଆଣି ପଡିଶା ଘର ଅଧାରାସ୍ତାରେ ଛାଡି ଚାଲିଯାଇଥିବା ଜଣାପଡିଛି।
ମିଳିଥିବା ସୂଚନା ଅନୁଯାଇ ଅଭିଯୁକ୍ତ ଦୟାନିଧି ପୂର୍ବରୁ ଦୁଇଟି ବିବାହ କରି ସାରିଛି। ଦୀର୍ଘଦିନରୁ ଝିଆରୀ ଉପରେ ତାର ଖରାପ ନଜର ରଖିଥିବା ପରିବାର ଲୋକଙ୍କ ପକ୍ଷରୁ କୁହାଯାଇଛି। ଏଥିନେଇ ପୀଡିତାଙ୍କ ପରିବାର ତରଫରୁ ଥାନାରେ ଅଭିଯୋଗ କରାଯିବା ପରେ ଝିଅର ବୟାନ ମୁତାବକ ଅଭିଯୁକ୍ତ ବଡବାପା (ଦୟାନିଧି ଜେନା)ବିରୋଧରେ ମୋକଦ୍ଦମା ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି।