ରାଷ୍ଟ୍ରପତି ଭବନରେ ହେବାକୁ ଯାଉଛି ସିଆର୍ପିଏଫ୍ର ଆସିଷ୍ଟାଣ୍ଟ କମାଣ୍ତାଣ୍ଟ ପୁନମ ଗୁପ୍ତାଙ୍କ ବିବାହ ଉତ୍ସବ। ଇତିହାସରେ ପ୍ରଥମଥର ପାଇଁ ରାଷ୍ଟ୍ରପତି ଭବନ ରେ ବାଜିବ ଶେହନାଇ, ସଜାହେବ ମଣ୍ଡପ, ଏବଂ ବିବାହ ବନ୍ଧନରେ ବାନ୍ଧି ହେବେ ଦୁଇ ସିଆରପିଏଫ୍ ଯବାନ।
ସୂଚନା ମୁତାବକ ପୁନମ୍ ଗୁପ୍ତା କିଛି ମାସ ହେବ ରାଷ୍ଟ୍ରପତି ଭବନରେ ପର୍ସନାଲ ସିକ୍ୟୁରିଟି ଅଫିସର ବା ପିଏସଓ ଭାବରେ କାର୍ଯ୍ୟରତ ଅଛନ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସୁରକ୍ଷାରେ ନିୟୋଜିତ ଅଛନ୍ତି । ପୁନମଙ୍କ ଉତ୍ତମ ବ୍ୟବହାର, କର୍ତ୍ତବ୍ୟ ପରାୟଣତାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ବେଶ୍ ପ୍ରଭାବିତ ।
ପୁନମଙ୍କ ଘର ମଧ୍ୟପ୍ରଦେଶ ଶିବପୁରୀରେ । ଆସିଷ୍ଟାଣ୍ଟ କମାଣ୍ତାଣ୍ଟ ଅଭିନାଶ କୁମାରଙ୍କ ସହ ପୁନମ୍ ବିବାହ କରିବାକୁ ଯାଉଛନ୍ତି ।ଯେତେବେଳେ ରାଷ୍ଟ୍ରପତି ମହୋଦୟା ପୁନମଙ୍କ ବାହାଘର ଠିକ ହୋଇଥିବା କଥା ଜାଣିପାରିଲେ । ସେତେବେଳେ ବିବାହକୁ ରାଷ୍ଟ୍ରପତି ଭବନର ମଦର ଟେରେସା କ୍ରାଉନ୍ ପରିସରରେ କରିବା ପାଇଁ ସେ ନିର୍ଦ୍ଦେଶ ଦେଲେ । ତେବେ କିଛି ଜଣାଶୁଣା ଲୋକଙ୍କ ଉପସ୍ଥିତିରେ ୧୨ ତାରିଖରେ ବିବାହ ସଂପନ୍ନ ହେବ ।